Undirritaður samningur við Vegagerðina vegna göngu- og hjólastígs við Mývatn.

• Fréttir
• 9. desember 2020

Undirritaður hefur verið samningur við Vegagerðina um stuðning við lagningu göngu- og hjólastígs frá Dimmuborgum að Skútustöðum.

Lagning göngu- og hjólastígs frá Reykjahlíð að Dimmuborgaafleggjara er hafin og verður lokið vorið 2021. Stuðningur Vegagerðarinnar við áframhald verkefnisins er afar mikilvægur í samhengi viðspyrnu atvinnulífsins í Skútustaðahreppi, umferðaröryggis, loftslagsmála og í samræmi við opinbera stefnumótun á mörgum sviðum, t.d. áfangastaðaáætlun Ferðamálastofu, umferðaröryggisáætlun Skútustaðahrepps og Hamingjuverkefni Skútustaðahrepps.

Með lagningu stígsins frá Skútustöðum að Reykjahlíð aukast möguleikar íbúa og ferðamanna til að njóta einstakrar náttúru Mývatnssveitar samhliða hollri hreyfingu og útiveru. Á komandi mánuðum er stefnt að fullhönnun stígsins, í samstarfi við landeigendur og Vegagerðina, auk þess sem sjónum verður sérstaklega beint að nýsköpunartækifærum sem geta tengst þeirri innviðauppbyggingu sem framundan er.

• Síðast uppfært: 9. desember 2020