Vel sóttur og fróđlegur íbúafundur um húsnćđismál

  • Fréttir
  • 11. maí 2018

Á dögunum var haldinn afar áhugaverður íbúafundur um húsnæðismál í sveitarfélaginu. Eins og sjá má á myndinni var aðsóknin mjög góð sem endurspeglar kraftinn í samfélaginu og bjartsýni fyrir framtíðinni. Aðdragandi fundarins var að sveitarstjórn samþykkti húsnæðisáætlun í nóvember þar sem staðan var kortlögð. Í framhaldi af því hefur verið fundað með verktökum og áhugasömum aðilum.

Ákveðið var að halda íbúafund með yfirskriftinni Hefur þú áhuga á því að kaupa íbúðarhúsnæði? Sveitarstjóri kynnti þar Húsnæðisáætlun Skútustaðahrepps, þrír verktakar/aðilar kynntu hugmyndir um uppbyggingu í Klappahrauni og Sparisjóður Suður-Þingeyinga og Íslandsbanki kynntu möguleika á fjármögnun fyrir einstaklinga. Vonandi er þetta fyrsta skrefið í átt að frekari uppbyggingu í Klappahrauni. Nokkrir rekstraraðilar eru í startholunum að taka þátt í verkefninu og vonandi munu íbúar sjá hag sinn í því að vera með.

Áhugasamir aðilar eru beðnir að senda upplýsingar á netfangið thorsteinn@skutustadahreppur.is svo hægt sé að kortleggja eftirspurnina og taka ákvörðun um næstu skref.

Deildu ţessari frétt